Një grup prej alpinistësh kanë mbetur të bllokuar prej disa orësh në malin e Murganës pranë kufirit me Greqinë. Një 17 vjeçar, pjesë e grupit të tyre ka thyer këmbën dhe është thuajse e pamundur që të transportohet, për këtë shkak ata kanë kërkuar ndërhyrje nga ajri. Ndërhyrja me helikopter nuk ishte e mundur, ndaj grupi po përpiqet ta zbresë vetë të plagosurin deri sa të mbërrijnë forcat e policisë që kanë filluar ngjitjen rreth 30 minuta më parë.
Policia ka dhënë informacion zyrtar për bllokimin e alpinistëve në malin e Murganës. Sipas Policisë, asnjë prej alpinistëve nuk ka rrezik për jetën teksa ata po transportohen në fshatin Sotirë. Policia u njoftua nga një telefonatë dhe menjëherë u vendos në lëvizje së bashku me forcat Shqiponja të DVP Gjirokastër, shërbimet e Postës së Policisë Dropull dhe Forcat e Ushtrisë.
Gjirokastër/ Informacion Paraprk
Në sallën e Drejtorisë Vendore të Policisë Gjirokastër ka ardhur një telefonatë se disa alpinistë ndodhen në malin Morgan, mbi fshatin Sotirë dhe kanë nevojë për ndihmë pasi shtetasi E. K., rreth 17 vjeç është rrëzuar dhe ka dëmtuar këmbën.
Menjëherë pas njoftimit janë nisur për në malin Morgan, forcat Shqiponja të DVP Gjirokastër, shërbimet e Postës së Policisë Dropull dhe Forcat e Ushtrisë për tiu ardhur në ndihmë këtyre shtetasve.
Aktualisht këta shtetas po ndihmohen nga shërbimet e policisë, ku po transportohen me mjetet e policisë drejtë fshatit Sotirë dhe asnjë prej tyre nuk ka rrezik për jetën.
