Një ngjarje e rëndë ndodhi pasditen e djeshme, ku një 34-vjeçare në Elbasan, humbi jetën në maternitet, vetëm disa orë pas abortit.

Pas ngjarjes tragjike, policia procedoi penalisht dy mjekët e maternitetit. Mediat kanë siguruar dëshminë e mjeku reanimator, Behar Gjevori i cili u procedua penalisht nga policia pas ngjarjes së rëndë.

Ai tregon se e reja kishte abortuar edhe disa herë më parë, ç’ka e shtonte rrezikun e ndërhyrjes. Mjeku Gjevori shprehet se 34-vjeçarja në momentin që doli nga spitali, ishte në gjendje të mirë shëndetësore.

Pas anestezisë, mjeku shprehet se 34-vjeçarja iu nënshtrua edhe kontrollit me eko, ku ka rezultuar se ka qenë në gjendje të mirë shëndetësore. Gjevori tregon se pas kësaj, vajza është larguar.

Drejtori i spitalit të Elbasanit, Agron Gaxha thotë se 34-vjecarja që humbi jetën pasi kishte kryer abort e mori trajtimin e nevojshëm mjekësor në spital. Gaxha shprehet se janë në pritje të ekspertizës mjeko-ligjore për të mësuar shkaqet e humbjes së jetës.

“Pacientja ka marrë trajtimin e nevojshëm në spital. Nuk mund të shprehemi për shkaqet e humbjes së jetës pa dalë ekspertiza mjeko-ligjore. Jemi ende në pritje të shkresës”, tha Gaxha