Ka shkuar në më shumë se 15 mijë numri i të vdekurve nga tërmeti tragjik që goditi Turqinë dhe Sirinë, mëngjesin e së hënës.

Autoritetet nuk kanë bërë ende një ndarje të detajuar të kombësisë së viktimave. Turqia është shtëpia e rreth 3.6 milionë refugjatëve sirianë, sipas shifrave të OKB-së, me qindra mijëra sirianë që jetojnë në qytetin jugor të Gaziantepit, afër epiqendrës së tërmetit.

Ekipet e kërkim – shpëtimit po luftojnë me kushtet e vështira atmosferike për të gjetur të mbijetuarit në rrënoja.

Ditën e djeshme presidenti turk Erdogan pranoi “mangësitë” për reagimin e shtetit, por këmbënguli se situata tani ishte nën kontroll.

Ndërkohë OBSH ka rritur përgjegjësinë e saj në Siri dhe Turqi sepse sëmundjet tashmë të pranishme në këto shtete pritet të përforcohen pas tërmetit.

Sakaq, BE njoftoi një konferencë donatorësh për të mbledhur fonde për viktimat.