Teksa kanë kaluar 100 orë nga tërmeti shkatërrimtar që goditi Turqinë dhe Sirinë, familjarët e personave të mbetur nën rrënoja ende nuk i kanë humbur shpresat për të dashurit e tyre.

Edhe pse shanset për të gjetur të mbijetuar janë shumë të vogla, herë pas here ekipet e shpëtimit japin lajme të mira për nxjerrjen nga rrënojat e të mbijetuarve.

Një vajzë 10 vjeçare është shpëtuar pas 90 orësh duke kthyer besimin se mrekullitë ekzistojnë. Vogëlushja u gjet nën rrënojat e pallatit 7 katësh në Hatay.

Sipas mediave turke, ekipet e shpëtimit kanë gërmuar një galeri për ta shpëtuar. Ajo ishte e bllokuar dhe me aprovimin e të afërmve u vendos që t’i pritej krahu.

Ajo është e vetmja e mbijetuar pasi prindërit dhe 3 vëllezërit u gjetën të pajetë nën rrënoja.

Kujtojmë që nga tërmeti i 6 shkurtit që goditi Turqinë dhe Sirinë raportohen aktualisht 21 mijë të vdekur. Por pritet që kjo shifër të rritet pasi numri i personave nën rrënoja mendohet të jetë më i lartë.