Kryetari i Partisë Demokratike Lulzim Basha, me anë të një statusi në “Facebook”, ka publikuar një foto, ku paraqitet në homazhet, e bëra në nder të ndarjes nga jeta të kompozitorit të njohur, Agim Krajka.

Basha thekson se Kraja i kushtoi jetën kombit, duke shtuar se trashëgimia e tij do të mbetet një shembull për të gjithë shqiptarët.

Statusi që kryetari i PD-së Lulzim Basha ka bërë:

Me hidhërim të madh mësova për ndarjen nga jeta të kompozitorit të shquar, Artistit të Merituar dhe Nderit të Kombit Agim Krajka. I shpreh ngushëllimet më të thella familjes së maestro Krajkës, të afërmve dhe miqve të tij. Shqipëria është sot në dhimbje dhe kujton me nderim dhe respekt të veçantë jetën e jashtëzakonshme të këtij burri të shquar, i cili ia kushtoi jetën ushqimit të shpirtrave të shqiptarëve në ditët e thatësirës më të madhe kulturore e shpirtërore të kombit.

Vepra e maestro Krajkës qëndron si një testament për fuqinë e artit, provë se një vepër e vetme mund të bëjë dallimin, në çdo shpirt, në çdo shtëpi, në të gjithë vendin. Përpjekjet e palodhura të Agim Krajkës i dhanë atij jo vetëm titullin Artist i Merituar dhe Nderi i Kombit, por edhe respektin e mijëra shqiptarëve të frymëzuar nga arti i tij, si akt sublim lirie.

Trashëgimia e tij do të qëndrojë mes nesh si një shembull për të gjithë ne që të ngulmojmë në përpjekjen drejt të hijshmes dhe përsosjes!

Shkruan Lulzim Basha.