Kreu i KQZ, Ilirian Celibashi, është pyetur këtë paradite të së hënës nga gazetarët, lidhur me dy rastet e kandidatëve për kryetar bashkie të denoncuar, një nga lista e koalicionit të Sali Berishës e Ilir Metës, dhe një nga lista e PS.

Konkretisht, PS ka denoncuar kandidatin e “Bashkë Fitojmë” në Shijak, ndërsa “Bashkë Fitojmë” ka denoncuar kandidatin e PS në Kuçovë. Po ashtu, nga ana tjetër edhe PD e Gaz Bardhit ka denoncuar kandidatin e PS në Mallakastër.

Celibashi tha se për këto dy raste, ditën e mërkurë do të hapet procesi, dhe nëse rezulton se do të jetë nevojë për hetim të thelluar, do të angazhohet Prokuroria për ta bërë.

“Sa i përket pretendimeve në dy raste, mbi përputhshmërinë me ligjin për dekriminalizimin, me shumë mundësi të mërkurën do hapim procesin e shqyrtimit të kërkesave. Nëse do jetë rasti për procedim me hetim të theluar, do i kërkojmë Prokurorisë të angazhohet, në të kundërt do merret vendimi nga komisoneri për këta kandidatë”, deklaroi Celibashi.

Sakaq ai tha se po ashtu janë duke u shqyrtuar edhe tre raste që lidhen me regjistrimin e kandidatëve, një për këshillat bashkiakë dhe dy për kryetar bashkie.

“Presim shqyrtimin e tre rasteve që lidhen me regjistrimin e kandidatëve, s’ka të bëjë me verifikimin për dekriminalizim, por po shqyrtojmë aspekte teknike të regjistrimit. Bëhet fjalë për një për anëtarë këshilli dhe dy kandidatë për kryetarë bashkie, mos gaboj është Devolli dhe bashkia Finiq”, tha ai.