Policia ka dhënë reagimin zyrtar në lidhje me ngjarjen e rëndë të ndodhur mëngjesin e sotëm në Vaun e Dejës, ku një sasi tritoli ka shpërthyer në makinën e kreut të PD-së në këtë Bashki Bernard Ndreca.

Sipas policisë lënda plasëse ka shpërthyer në momentin që Ndreca ka hipur në mjet, fatmirësisht pa i shkaktuar atij lëndime. Policia dhe grupi hetimor thonë se po vijojnë me intesitet hetimet për zbardhjen e ngjarjes, e cila duket të jetë me ngjyrim politik, kur na ndajnë edhe disa ditë nga nisja e fushatës zyrtare për zgjedhjet e 14 Majit.

“Rreth orës 07:10, në fshatin Paçram, Vau i Dejës, në pjesën e përparme të automjetit tip “Audi”, në pronësi të shtetasit B. N., dyshohet se ka shpërthyer lëndë plasëse.

Me marrjen e njoftimit, menjëherë në vendngjarje kanë shkuar shërbimet e Policisë dhe grupi hetimor.

Nga veprimet e para rezulton se shpërthimi ka ndodhur në momentin që shtetasi B. N. ka hipur në automjet.

Nga shpërthimi, shtetasi B. N. nuk ka pësuar dëmtime, por janë shkaktuar vetëm dëme të pjesshme materiale.

Grupi hetimor, në drejtimin e Prokurorisë, vijon veprimet intensive në vendngjarje, me qëllim zbardhjen e rrethanave të ngjarjes, identifikimin dhe kapjen e autorit/ve”, njofton policia.