Policia e Shtetit ka ndërmarrë një plan masash për mbarëvajtjen e ndeshjes që do të zhvillohet sot mes Shqipërisë dhe Anglisë, në orën 18:00 në stadiumin “Air Albania”

Ndeshja do të luhet pa tifozë për shkak të pandemisë si pjesë e masave kufizuese për të shmangur përhapjen e infektimit.

Policia e Shtetit bën me dije se bizneset në stadium do të mbyllen përpara ndeshjes, po ashtu edhe rruga në afërsi të stadiumit do të bllokohet në momentin e hyrjes dhe daljes së ekipit të Anglisë, nga hoteli për tek “Air Albania”.

Në lidhje me pjesëmarrjen e tifozëve gjatë ndeshjes Shqipëri-Angli, Presidenti i Federatës Shqiptare të Futbollit Armando Duka i ka dërguar një letër kryeministrit Edi Rama ku i kërkon lejimin e tyre në masën 30%, por kjo kërkesë u refuzua nga Komiteti i Ekspertëve, pasi rrezikohet shëndeti i qytetarëve për shkak të COVID-19.