Një trup i pajetë, i dekompozuar është gjetur në një banesë në qytetin e Shkodrës, ndërsa sipas policisë i përket një shtetasi korean që ishte vendosur në Shqipëri prej disa kohësh. Trupi i dekompozuar është gjetur nga pronari i banesës, të cilit koreani nuk i kishte hapur prej kohësh telefonit.

Sipas policisë së Shkodrës në banesë janë gjetur doza me lëndë narkotike, dhe mbidoza dyshohet të jetë dhe shkaku i vdekjes së 39 vjeçarit korean.

Njoftimi i policisë:

Mbrëmjen e djeshme, salla operative e Drejtorisë Vendore të Policisë Shkodër ka marrë njoftim nga shtetasi A. V., 38 vjeç, se në banesën që kishte lënë me qira, në lagjen “Naim Gjylbegu”, kishte gjetur të dekompozuar trupin e shtetasit D. K., 39 vjeç (qiramarrësi), lindur në Korenë e Jugut dhe banues në Shkodër (që nga muaji shkurt i vitit 2022).

Sipas deklarimeve të 38-vjeçarit, ai kishte shkuar në këtë banesë, pasi prej muajsh nuk kishte përgjigje nga qiramarrësi i saj, shtetasi D. K., dhe kur ka konstatuar trupin e dekompozuar të këtij shtetasi, ka njoftuar menjëherë Policinë.

Nga këqyrja paraprake e trupit të 39-vjeçarit, nuk janë konstatuar shenja dhune, ndërsa nga kontrollet e imtësishme në këtë banesë, janë gjetur disa doza të dyshuara të lëndëve narkotike. Paraprakisht dyshohet se shtetasi D. K. e ka humbur jetën nga mbidoza e lëndëve narkotike.

Grupi hetimor vijon punën për sqarimin e plotë të rrethanave të kësaj ngjarjeje.