Redin Caushaj, 25-vjeç, me detyre efektiv policie, mbeti i plagosur me thikë mbrëmjen e kaluar, pasi ndërhyri për të shuar një konflikt mes disa personave në fshatin Pilur në Himarë.

Efektivi, me detyrë inspektor i Policisë së zonës Lukovë, jashtë orarit të shërbimit, ishte duke kaluar në rrugë dhe kur ka parë personat që po konfliktoheshin ka ndërhyrë menjëherë për të parandaluar përshkallëzimin e konfliktit.
Gjatë përpjekjes për të parandaluar përshkallëzimin e mëtejshëm të konfliktit, njëri prej tyre, shtetasi Thodhori Mërkuri 60 vjeç, nga fshati Pilur, e ka goditur me mjet prerës thikë në pjesën e qafës dhe për pasojë punonjësi i policisë ka mbetur i plagosur rëndë.

Gjendja e tij shëndetësore raportohet se është stabilizuar dhe ndodhet jashtë rrezikut për jetën, por me dëmtime. Kolegët e tij dhuruan gjak për t’i ardhur në ndihmë punonjësit të policie. 60-vjeçari Thodhori Mërkuri u arrestua pas disa orësh ndjekje nga policia. Ai ishte fshehur në ambientet e ish-repartit ushtarak në fshatin Pilur.