Ministri i Brendshëm, Taulant Balla ka falënderuar të gjitha shërbimet e përfshira në shuarjen e flakëve që rrezikuan që prej mbrëmjes së djeshme fshatin e Zhamës.

Balla tregon se nëse nuk do të punohej pa ndërprerje deri mëngjesin e sotëm, dëmet mund të kishin qenë shumë të mëdha.

Taulant Balla:

Falë punës së pandërprerë të forcave të zjarrfikëse të Lushnjes, Fierit, Divjakës, Beratit, Roskovecit, Rrogozhinës, Peqinit, Kuçovës, kompanisë Albpetrol, ndihmuar edhe nga efektivë të Forcave të Armatosura dhe punonjës të ndërmarrjeve të Bashkisë Lushnjë, zjarri në Zhamë u shua plotësisht. Shumë mirënjohje për përkushtimin dhe profesionalizmin e lartë, duke shmangur dëme shumë, shumë më të mëdha nëse nuk do të ishte arritur vendosja nën kontroll gjatë natës dhe nëse nuk do të ishte punuar pa ndërprerje deri në mëngjezin e sotëm.

Sipas informacioneve, 58-vjeçari Ramadan Zoga kishte ndezur një zjarr për djegien e mbeturinave në fshatin Zhamë, dhe më pas flakët janë përhapur duke djegur sipërfaqe të konsiderushme me ullinj, bimësi dhe shkurre.