U ekzekutua pasditen e sotme në malin e Shoshit në Dukagjin, Zef Guri. I plagosur rëndë mbeti djali i tij, Gjin Guri. Ndaj tyre është qëlluar me breshëri kallashnikovi nga persona ende të paidentifikuar.

Drejtues të lartë të Policisë së Shtetit, sikurse shërbimet e RENEA-s dhe të FNSh-së janë vënë në aksion për identifikimin dhe kapjen e autorëve.

“Në drejtim të Dukagjinit janë nisur drejtues të lartë të Policisë së Shtetit dhe të Drejtorisë Vendore të Policisë Shkodër, shërbime të Repartit Special RENEA dhe FNSh-së, ekspertë kriminalistë dhe specialistë për Hetimin e Krimeve të Rënda nga Departamenti për Policinë Kriminale në DPPSh, me qëllim zbardhjen e rrethanave të ngjarjes, identifikimin dhe kapjen e autorit/ve”, njofton policia.

Në njoftimin e mëparshëm të policisë, u bë me dije, se rreth orës 18:45 ka mbërritur një telefonatë e cila ka bërë me dije mbi ngjarjen.

Forcat e policisë e kanë pasur të vështirë të mbërrijnë në vendngjarje për shkak të terrenit të vështirë dhe u bë me dije se dy helikopterë ishin nisur drejt vendit të ngjarjes.

Sipas informacioneve paraprake të burimeve, thuhet se shënjestër e atentatit ishte djali i viktimës, Gjin Guri. Një emër i njohur ky për drejtësinë.

Më 15 nëntor të vitit 2021 Gjin Gurit i është vendosur një tritol në lokalin e tij në buzë të rrugës që të çon në malin e Shoshit në Dukagjin.

Nga shpërthimi nuk pati të lënduar, vetëm dëme materiale, ndërsa autorët mbetën të pazbuluar