Tre persona janë ekzekutuar në dy ditët e fundit në Shqipëri!

Sot Gjin Guri në Dukagjin

Dje Martin Bardhi në Rrëshen dhe Fatjon Dervishi në Sukth.

Zef Guri është i vrari i fundit, ku në malin e Shoshit në Dukagjin, është qëlluar me breshëri kallashnikovi ndaj tij dhe të birit, Gjin Guri, një emër i njohur ky për drejtësinë.

Sipas burimeve, shënjestër e atentatit ka qenë i biri për shkak të konflikteve për kultivimin e narkotikëve.

Policia ka marrë njoftimin rreth orës 18:45 dhe shërbimet e saj, së bashku me grupin hetimor, janë nisur menjëherë për në vendngjarje, por për shkak të largësisë dhe të terrenit të vështirë nuk e kanë pasur të lehtë mbërritjen.

Gjin Gurit, djalit të viktimës në Dukagjin i është vendosur dhe tritol në lokalin e tij në buzë të rrugës që të çon në malin e Shoshit në Dukagjin, ngjarje e shënuar më 15 nëntor të vitit 2021. I shumëkërkuari, Gjin Guri ishte dënuar me vendim të formës se prerë më 7 vjet e dy muaj burg për “Prodhim dhe mbajtje pa leje të Armëve luftarake” dhe “Kanosje”, pas shkëmbimit të zjarrit me skuadrën e policisë.

Në Rrëshen, përpos vrasjes së 59-vjeçarit Martin Bardhi, në lokalin e tij, rreth orës 10:40 pranë Komisariatit dhe Spitalit, u plagosën tre të afërmit e tij, Oltion Gjini, ish-drejtor në bashkinë e Mirditës, Ilir Bardhoku, pronar i një lokali në zonë dhe Indrit Bardhi.

Fatjon Dervishi, sipas burimeve, është qëlluar mbrëmjen e djeshme me breshëri kallashnikovi, te shinat e trenit në Katund të Sukthit, duke shkaktuar vdekjen e tij gjatë transportimit për në spital.