Gazment Bardhi ka reaguar në lidhje me përjashtimin nga grupi parlamentar të Partisë Demokratike të 11 deputetëve.

Ky vendim erdhi nga kreysia e PD-së së drejtuar nga Lulzim Basha. Ditën e sotme vendimi iu bë i ditur Kuvendit të Shqipërisë dhe kryetares Lindita Nikolla. Deputetët e përjashtuar janë pjesëtarë të Rithemelimit dhe mbështetës të Sali Berishës.

Për Bardhin ky është një vendim qesharak dhe nuk duhet marrë seriozisht. Sipas Bardhit, Basha nuk ka as legjitimitet dhe as forcë për të përjashtuar askënd.

Këto janë akte qesharake që thjesht zhvendosin vëmendjen në interes të Edi Ramës, por jo demokratëve dhe opozitarëve.

Reagimi i Gazment Bardhit:

Merreni me të qeshur dhe boll harxhuat rreshtat me çfarë bën Lulzim Basha. Përvecse humorit tek çdo mendje normale njerëzore, kanë zero efekt. Është fiks si pohimi “falë mundit tuaj nga sot Edi Rama nuk është më Kryeministër”, që demokratët e dëgjonin pas çdo proteste në 10 vjet opozitë!

Si njëri nga deputetët e PD, Lulzim Basha nuk ka as legjitimitetin, por as forcën për të përjashtuar askënd. Ndryshimi i përbërjes së grupit parlamentar mund të ndodhë VETËM me vendim të grupit parlamentar. Përtej kësaj, asnjë copë letre, asnjë firmë dhe asnjë vulë e keqpërdorur në ilegjitimitet, nuk ka vlerë. 

Ftoj secilin koleg të përqëndrohet tek skandali i Edi Ramën me korruptimin e një zyrtari të FBI, që pranoi fajësinë dhe marrëdhënien e biznesit me Kryeministrin, si dhe tek sjellja skandaloze e Edi Ramës në raport me zhvillimet në Kosovë.

Aktet qesharake që bëhen për të zhvendosur vëmendjen nga këto dy çështje nuk mund të marrin asnjë sekond nga veprimtaria e Grupi Parlamentar të PD. Zhvendosja e vëmendjes është interes i Edi Ramës, por jo i demokratëve dhe opozitarëve. 

Një ftesë të sinqertë kam edhe për kolegun Lulzim Basha. Në vend të letrave pavlerë që synojnëpërçajnë opozitën dhe mbajtjen ndezur të konfliktit mes vetes, të përqendrohet në çështje që nuk i shërbejnë forcimit të pushtetit të Edi Ramës, por dobësimit të tij.