Detaje të reja nga tentativa për trafikim të armëve të zjarrit nga Kapshtica drejt Greqisë. Bëhet fjalë për 3 kallashnikovë, një pistoletë TT, krehra të armëve të zjarrit dhe një sasi municioni luftarak që u gjetën në mjetin e Xhimi Hoxha dhe Miklovan Veliu, të dy të ndaluar nga policia.

Në Kapshticë automjeti u përzgjodh për kontroll në vijën e dytë pas analizës së riskut. Destinacion armet kishin Selanikun.

Kontrollorët i bënë pyetje shoferit, i cili shfaqi pasiguri. Më pas automjeti u kalua në vijë të dytë për kontroll të detajuar.

Dy të arrestuarit gjatë marrjes në pyetje nga specialistët për Hetimin e Trafiqeve të Paligjshme të DVP Korçë mohuan se kishin lidhje me njëri-tjetrin për trafikimin e armëve.

Por pretendimet e tyre janë të pavërteta pasi Policia gjeti dhe sekuestroi prova që faktonin bashkëpunimin mes dy të arrestuarve, konkretisht mesazhe dhe video mes njëri-tjetrit kur sajonin vendin në automjet për të fshehur armët.

Videot e mesazhet u gjetën në telefonin e njërit prej dy të arrestuarëve.