Një plagosje me thikë ka ndodhur sot në qytetin e Durrësit. Shtetasi B.M., 30 vjeç ka gjuajtur me thikë një 17 vjeçar, i cili ndodhet në spital jashtë rrezikut për jetën.

Plagosja ka ndodhur në zonën e plazhit.

Menjëherë pas njoftimit policia ka shkuar në vendngjarje dhe ka shoqëruar 30 vjeçarin në Komisariatin e Policisë.

Njoftimi i Policisë:

Plazh, Durrës

Dëmtoi me mjet prerës, një 17-vjeçar, për shkak të një konflikti për motive të dobëta, kapet menjëherë pas ngjarjes dhe shoqërohet në ambientet e Policisë 30-vjeçari.

Pasditen e sotme, në lagjen nr. 13, dyshohet se për shkak të një konflikti për motive të dobëta, ndërmjet shtetasit B. M., 30 vjeç dhe një 17-vjeçari, në ambientet e jashtme të një picerie, shtetasi B. M. ka dëmtuar me mjet prerës (thikë), 17-vjeçarin, i cili ndodhet në spital, në kujdesin e mjekëve dhe është jashtë rrezikut për jetën.

Menjëherë pas njoftimit, shërbimet e Stacionit të Policisë Plazh kanë mbërritur në vendngjarje, kanë kapur shtetasin B. M. dhe e kanë shoqëruar atë, në ambientet e Stacionit të Policisë, për kryerjen e veprimeve të mëtejshme procedurale.

Materialet procedurale do t’i kalojnë Prokurorisë së Durrësit, për kryerjen e hetimeve të mëtejshme.