Një furgon me më shumë se 20 persona u përmbys pranë kufirit austriak, në një përpjekje për t’iu shmangur policisë.

Të paktën shtatë persona u vranë dhe disa të tjerë u plagosën pasi furgoni me emigrantë u përmbys këtë të premte në shtetin jugor gjerman të Bavarisë .

Të plagosurit, mes të cilëve gra dhe fëmijë, u dërguan në spitalet e afërta për trajtimin e tyre.

Furgoni kishte udhëtuar rreth 50 kilometra drejt Mynihut nga kufiri midis Austrisë dhe Gjermanisë kur u përpoq t’i shpëtonte kontrollit të policisë, thanë zyrtarët. Shoferi i furgonit shpejtoi mjetin kur kuptoi se ishte vënë re nga policia.

Zyrtarët bllokuan rrugët që të çojnë në Mynih dhe nisën një hetim për një vrasje të mundshme.