Policia e Fierit ka finalizuar një operacion për kapjen e një shtetasi të shpallur në kërkim ndërkombëtar.

Një 43 vjeçar është arrestuar nga policia në Fier pasi është shpallur në kërkim ndërkombëtar nga vepër penale “Vrasje me dashje”. Në prangat e policisë ra shtetasi Edmond Braka, banues në Fier.

Arrestimi i 43-vjeçarit u bë me qëllim ekstradimin drejt shtetit fqinj, pasi Gjykata e Genovas në Itali e ka dënuar me 16 vite burgim.

Njoftimi i policisë

Nga Sektori për Hetimin e Krimeve të Rënda në DVP Fier, në bashkëpunim me Interpol Tirana, në vijim të punës për kapjen e personave të shpallur në kërkim ndërkombëtar, u bë i mundur lokalizimi, kapja dhe arrestimi i përkohshëm, me qëllim ekstradimin drejt Italisë, i shtetasit Edmond Braka, 43 vjeç, banues në Fier.

Arrestimi i këtij shtetasi u bë pasi Gjykata e Genovas, Itali e ka dënuar me 16 vite burgim, për veprën penale “Vrasje me dashje”.

Interpol Tirana, në bashkëpunim me Interpol Romën, vijon procedurat për ekstradimin e këtij shtetasi drejt Italisë.