Apeli ka miratuar masën e arrestit me burg ndaj ish-shefit të komisariatit të Kurbinit, Dritan Metaj. Ky vendim erdhi pas dyshimeve se Metaj mund të ketë ndihmuar anëtarët e një grupi trafikantësh të drogës për të shmangur operacionet policore.

Kujtojmë se Dritan Metaj u arrestua si pjesë e një grupi kriminal që drejtohej nga Gëzim Çela, njohur ndryshe si “baroni” i drogës në zonën e Fushë Kuqes.

Metaj dyshohet se ka përdorur makinën e policisë për të asistuar grupin e trafikantëve dhe është quajtur “baron i drogës” për këtë veprimtari të tij.

Njoftimi i gjykates:

Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Florjan Kalaja, sot më 30.10.2023, shpalli vendimin mbi çështjen penale nr. 52 akti, datë 26.10.2023 regjistrimi, regjistruar mbi ankimin e paraqitur nga i hetuari/ankuesi D.M., ndaj vendimit nr. 111, datë 10.10.2023 (në lëndë të masave të sigurimit) të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:
– Miratimin e vendimit nr. 111 akti datë 10.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar.