Të dhënat e INSTAT tregojnë një rënie të konsiderueshme të lindjeve dhe vdekjeve në tremujorin e tretë të vitit 2023, reflektuar në shtesën natyrore të popullsisë. Sipas raportit, numri i lindjeve ka rënë me 7.4%, duke shënuar një shifrë prej 6,070, ndërsa numri i vdekjeve ka rënë me 7.8%, me një shifrë prej 5,004 në shkallë vendi.
Gjatë këtij tremujori, gjashtë qarqe kanë një shtesë natyrore pozitive të popullsisë, ndërsa në gjashtë qarqet e tjera, shtesa natyrore është negative. Tirana ka një shtesë natyrore pozitive më të lartë me 913 lindje më shumë sesa vdekje, ndërsa Korça ka një shtesë natyrore më të ulët me 132 vdekje më shumë se lindje.
Në krahasim me tremujorin e tretë të vitit 2022, një qark shënon rritje të lindjeve, ndërsa njëmbëdhjetë qarqe të tjera shënojnë rënie. Tirana ka numrin më të lartë të lindjeve me 2,233, ndërsa Gjirokastra ka numrin më të ulët me 115.
Nëse vjen fjala për vdekjet, njëmbëdhjetë qarqe shënojnë ulje të numrit të vdekjeve, ndërsa një qark shënon rritje. Tirana ka numrin më të lartë të vdekjeve me 1,320, ndërsa Kukësi ka numrin më të ulët me 120. Qarku i Gjirokastrës shënon rënie më të madhe në përqindje të vdekjeve me 22.0%.
