Ish-kryeministri Sali Berisha mbajti një takim me qytetarë dhe demokratë në Kavajë, duke ngritur akuza të ashpra kundër kryeministrit aktual, Edi Ramës. Berisha theksoi se vendi po përjeton një diktaturë të bandave, e cila, sipas tij, është forma më e egër e diktaturave, duke krahasuar me ato komuniste apo naziste.

Në fjalën e tij, Berisha shprehu shqetësimin për gjendjen e ekonomisë, duke theksuar se 1/3 e popullsisë së vendit ka ikur në 10 vitet e qeverisjes së Ramës. Ai gjithashtu akuzoi kryeministrin për fitoren në zgjedhje përmes lidhjeve me kriminelë dhe para droge, të cilët më pas shpallen si investitorë strategjikë për vendin.

Në këto 10 vite në vend se të respektohet, rrëzon një nga një shtyllat e një shoqerie të mirë, shtyllat e një rendi demokratik. Vërsuli në të katër anët e Shqipërisë bandat, kriminelët, drogë, pushtet dhe çdo gjë që qytetarët të mos votojnë të lirë. Vendosi një raport në Shqipëri midis votës dhe krimit. Krimi shndërrohet në votë dhe vota në krim. Kurrë ndonjëherë Shkodra nuk ka përjetuar ndonjë terror të tillë ditën e votimit. Edi Rama fitoi Shkodrën, por Shkodrën sot e qeverisin Pëllumb Gjokat, Bajrat, Tom Doshat e saj. Po kështu Krujën, po kështu Durrësin, Elbasanin, Fierin. Dhe ç’ndodh pastaj? Këta kriminelë marrin tituj të investitorit strategjik. Marrin licensa si kazino, shpallen hotelet e tyre si hotele me 5 yje. Të rinjtë largohen dhe vetëm largohen. 1/3 e kombit në 10 vite nuk është më në Shqipëri. Një rënie në pikiatë e gjendjes ekonomike të shqiptarëve. Ju garantoj se në këtë diktaturë të cilën Samuel Hantington studiues të sistemeve politke, thotë se diktatura e bandave është më e keqe se diktatura komuniste, naziste se format më të egra të diktaturës, tha Berisha.