Policia ka publikuar emrat e 11 personave për të cilët janë lëshuar urdhër arreste pas një hetimi të kryer nga SPAK dhe policia.

Operacioni ka shënuar goditjen e një tjetër grupi kriminal, duke përdorur prova të siguruara përmes zbërthimit të aplikacioneve SKY.

Ervin Mata është një nga më të kërkuarit, akuzuar për grup të strukturuar kriminal dhe trafik narkotikësh, ndërsa është në kërkim. Ismail Zeneli dhe Bujar Ajeti janë akuzuar për të njëjtat vepra kriminale.

Dedan Gjoni, shefi krimeve në Komisariatin nr. 6, akuzohet për kushtëzimin e një vrasjeje dhe trafik ndërkombëtar droge.

Ish-nëndrejtori i policisë Erzen Breçani akuzohet për pastrim parash, ndërsa djali i tij, Erald, për trafik droge e pastrim parash.

Akuzime janë hedhur edhe ndaj Besmir Muratit, Artan Sulejmanit, Albert Prengës dhe Jonida Babameto.

Grupi kriminal dyshohet të ketë trafikuar kokainë nga Ekuadori dhe Kolumbia në Shqipëri dhe vende të Bashkimit Europian, duke synuar vrasje kundërshtarësh në vitet 2019-2020 në Durrës, Belgjikë dhe Holandë. Hetimet vijojnë për sqarimin e plotë të ngjarjes.