Një 27-vjeçar është arrestuar nga policia pasi ka ngacmuar seksualisht një 19-vjeçare në ambientet e punës së saj dhe më pas ka kërcënuar me një thikë një 20-vjeçare në Rrugën e Dibrës. Sipas burimeve, ky shtetas, i njohur si Marash Gjoklaj, ishte liruar me kusht pas një dënimi 4-vjeçar për të njëjtën vepër penale.
Policia e Tiranës ka reaguar ndaj kësaj ngjarjeje dhe ka bërë të ditur se shtetasi Marash Gjoklaj është arrestuar dhe materialet procedurale janë dërguar te Prokuroria pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme. Autori është i njohur për një dënim të mëparshëm prej 4 vitesh burg për marrëdhënie seksuale me dhunë me të rritura.
Njoftimi i policisë:
Ngacmoi seksualisht një shtetase, vihet në pranga 27-vjeçari. I arrestuari, i dënuar më parë me 4 vjet burgim, për marrëdhënie seksuale me dhunë me të rritura, aktualisht i liruar me kusht.
Specialistët për Hetimin e Krimeve të Komisariatit të Policisë Nr. 4, pas njoftimit të marrë se një një biznes në njësinë administrative nr. 8, një shtetas kishte ngacmuar seksualisht një 19-vjeçare, kanë organizuar menjëherë punën për identifikimin dhe kapjen e autorit dhe vënien e tij para përgjegjësisë ligjore.
Falë veprimeve të shpejta profesionale u bë i mundur identifikimi dhe vënia në pranga e autorit të dyshuar, shtetasit M. Gj., 27 vjeç, banues në Tiranë.
Ky shtetas, mbrëmjen e djeshme, ka ngacmuar seksualisht një 19-vjeçare, në ambientet e punës së saj.
Gjithashtu, po ditën e djeshme, i arrestuari dyshohet se ka kanosur me mjet prerës thikë, një 20-vjeçare, në Rrugën e Dibrës.
Nga verifikimet e kryera ka rezultuar se i arrestuari ka qenë i dënuar më parë me 4 vjet burgim, për marrëdhënie seksuale me dhunë me të rritura, dhe aktualisht është i liruar me kusht.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
