Avokati Redi Ramaj ka shfaqur shqetësimin e tij ndaj kontrollit të ushtruar nga SPAK në banesën e gazetarit Elton Qyno. Ai vlerësoi se trajtimi i këtij rasti është shqetësues dhe se çdo prokurori duhet të respektojë kodin e procedurës penale dhe ligjin, duke mbrojtur të drejtat dhe liritë themelore të njeriut.
Ramaj tha se në këtë rast duhet të merret parasysh profesioni i gazetarit dhe se roli i tij është të bëjë publike informacionet për qytetarët. Ai shtoi se detyra e Prokurorisë është të ruajë sekretin hetimor, ndërsa gazetari ka detyrë të publikojë informacionin që i ka në dorë.
Avokati theksoi se një qasje e tillë ndaj gazetarit është e gabuar dhe se duhet të ketë një mënyrë tjetër të trajtimit nga ana e prokurorisë. Ramaj përfundoi duke theksuar se interesi i qytetarëve është të informohen rreth ngjarjeve të rëndësishme dhe publikimi i informacionit nga gazetarët ka rol të rëndësishëm në këtë drejtim.
“Mendoj se është shqetësuese, në asnjë rast trajtimi që i bëhet gazetarit nga çdo lloj prokurorie e Shqipërisë duhet të jetë në përputhje me kodin e procedurës penale dhe me ligjin duke respektuar të drejtat dhe liritë themelore të njeriut.
Këto garanci duhet të respektohen, por duhet të merret në konsideratë edhe profesioni i tij. Interesi ynë si qytetarë është që çdo ngjarje e rëndë të bëhet publike sepse interesi qytetar është të dijë kë do votojë nesër.
Prokuroria ka detyrë të ruajë sekretin hetimor, nuk është detyra e gazetarit. Në këtë moment që flasim prokuroria duhet të ruajë përgjimet dhe të dhënat e hetimit, ndërsa gazetari ka detyrë të publikojë informacionin që i bie në dorë. Mënyra e trajtimit të gazetarit nga prokuroria është e gabuar, duhet të kishte një qasje tjetër”, u shpreh ai mes të tjerash.
