Një i ri shqiptar, identifikuar si Emiliano Jakupi, është arrestuar në lidhje me ngjarjen e rëndë në Gazi të Athinës, ku tre persona u plagosën rëndë. Jakupi akuzohet si bashkëpunëtori i personit që kryeu sulmin armatosur. Autoritetet greke janë ende në kërkim të një shqiptari tjetër të përfshirë në ngjarje.

Ngjarja ka ndodhur pas një debati mes dy shqiptarëve dhe tre të rinjve grekë, të cilët ishin në një festë bachelor në një lokal. Konflikti eskaloi kur njëri prej shqiptarëve goditi një nga grekët, ndërsa pasagjeri tjetër i fuoristradës hapi zjarr ndaj grupit të grekëve. Tre persona nga Kreta rezultuan të plagosur rëndë, duke përfshirë dy vëllezërit.

Emiliano Jakupi është raportuar se ka lidhje me grupin “Lions” dhe më parë është përfshirë në një rast të vrasjes në Shqipëri. Autoritetet dyshojnë se të arrestuarit mund të kenë lidhje me rastin e vrasjes së një shqiptari nga Delvina më 21 shkurt 2023. Dyshohet se ata mund të kenë tentuar të arratisen në Shqipëri, ndërsa një shqiptar tjetër është ende në kërkim në lidhje me ngjarjen.