Prokurori Arben Kraja ka paraqitur kërkesën për heqjen e imunitetit të ish-Kryeministrit Sali Berisha. Kërkesa është drejtuar Kuvendit pas vendimit të marrë për detyrimin e paraqitjes së Berishës. Kraja ka shpjeguar se prokuroria ka vepruar bazuar në legjislacionin në fuqi, Kushtetutën dhe Kodin e Procedurës Penale. Ai theksoi se masa e heqjes së imunitetit është e nevojshme për të vijuar hetimet dhe për të marrë masat e nevojshme shtrënguese, duke përfshirë edhe arrestimin në rast të nevojë. Kraja theksoi se ky veprim është në përputhje me ligjin dhe procedurat e përcaktuara. Ai gjithashtu bëri një analizë të legjislacionit dhe shpjegoi se nëse Kuvendi nuk miraton kërkesën, prokuroria ka mundësi të kërkojë masa të tjera të sigurimit.

“Ne kemi vepruar bazuar në legjislacionin në fuqi, në Kushtetutën dhe Kodin e Procedurës Penale dhe kemi paraqitur atë kërkesë, të cilën na e ka miratuar edhe Gjykata e Shkallës së Parë dhe Apeli. Kështu që nga pikëpamja e përmbajtjes jemi totalisht të bindur që kemi të drejtë dhe i qëndrojmë kësaj deri në fund. Cilat janë arsyet përse? Gjithmonë duhet t’i referohemi ‘Kushtet e procedimit’, nenin 288, sepse aty është gjitha baza te Kodi i Procedurës. Kur ndaj një deputeti duhet të caktohet masa e sigurimit e arrestit, burg ose në shtëpi, heqja e lirisë në çfarëdolloj forme, kontroll personal apo i banesës, prokurori kërkon autorizim. Gjithë debati që bëhet këtu është shumë i thjeshtë, është vetëm tek një shprehje; çfarë do të thotë heqje lirie. Besoj për arrest në burg e shtëpi nuk kemi diskutime as për kontrollet. Heqje lirie do të thotë heqje lirie, nuk është kufizim. Kufizim dhe heqje janë dy nocione krejt të kundërta. Kufizimi është më i ngushtë, heqja është totalisht heqje. Kur do ishim ne në rast të një heqje që unë mendoj që prokurori duhet Të vinte para jush të kërkonte leje?

Tek neni 232, llojet e masave shtrënguese. Një nga masat shtrënguese që parashikohen është shtrimi i përkohshëm në spital psikiatrik. Çfarë do të thotë kjo? Heqje totale e lirisë. Në kushtet të tilla, unë shpresoj që të mos kemi asnjë situatë të tillë, por ligji i parashikon këto situata, prokuroi patjetër duhet të vijë para Kuvendit, duhet të kërkojë leje për ta marrë këtë. E jep gjykata ose jo është histori tjetër pastaj. E dyta, thuhet te neni 289, mosdhënia e autorizimit, pra nëse ne vijmë me kërkesë për arrest dhe Kuvendi nuk e miraton sepse ka arsye e tij, nuk e pengon të kërkojë masa të tjera të sigurimit prokurorin, sipas nenit 244. Masat e tjera janë ato që ju thashë. Ne kemi bërë këtë procedurë”.