Sekretari për Reformën Zgjedhore dhe Përfaqësuesi Ligjor i PD-së, Rezart Kthupi, ka njoftuar se Partia Demokratike ka depozituar një projekt propozim në Kuvendin e Shqipërisë me qëllim krijimin e një mekanizmi ligjor për heqjen e plotë të imunitetit të deputetëve.

Në deklaratën e tij për mediat, Kthupi ka ftuar të gjithë deputetët të votojnë projekt vendimin si shenjë e vullnetit të tyre në luftën kundër korrupsionit dhe besimit në organet e drejtësisë. PD ka konsideruar imunitetin e deputetëve si një rudiment dhe një simbol të pabarazisë ndërmjet zgjedhësve dhe të zgjedhurve.

Projekti i propozuar krijon bazën ligjore për heqjen e plotë të imunitetit, duke lejuar deputetët të dorëzojnë një deklaratë me shkrim pranë kryetarit të kuvendit, duke hequr dorë nga procedurat parlamentare brenda një periudhe prej 5 ditësh nga miratimi i propozimit.

Partia Demokratike vlerëson se reforma në drejtësi, të cilën ajo e ka mbështetur në cdo hap, ka prodhuar më në fund një drejtësi të pavarur nga politika, e cila ka krijuar besimin dhe ka mbështetjen e gjerë qytetare në punën e saj për hetimin dhe goditjen e korrupsionit e lartë të politikës dhe administratës shtetërore.

Në kushtet e një drejtësie të pavarur partia demokratike vlerëson se çdo qëndrim kundër heqjes së plotë të imunitetit për deputetët është një tentative për të mos lejuar hetimin e korrupsionit të politikanëve apo të njerëzve të lidhur me ta.

Ftojmë të gjithë deputetët e kuvendit të Shqipërisë që të votojnë projekt vendimin e depozituar nga Partia Demokratike si shenjë e vullnetit të tyre në luftën kundër korrupsionit dhe besimit në organet e drejtësisë.