Eksperti i kriminalistikës, Ervin Karamuço, ka bërë një analizë të detajuar rreth ngjarjes së vrasjes së Arben Lleshit nga Sokol Mjaçaj brenda burgut të Peqinit. Karamuço sqaroi se si Mjaçaj mundi të merrte armën brenda burgut dhe të kryente vrasjen.

Sipas ekspertit, Mjaçaj e futi armën brenda burgut duke bashkëpunuar me një gardian. Lajmi i futjes së tij në regjimin 41 bis e nxitu atë të kryente këtë akt kriminal. Arma dyshohet se është futur në bashkëpunim me një pjesëtar të forcave të sigurisë të burgut.

“Personi ka qenë në godinë, ka parë lajmin në televizor, ka hyrë gjoja për të parë kafe, kur në fakt ka marrë pistoletën. I nxitur nga lajmi, hyri në qeli, qëlloi pesë herë, vrau Lleshin dhe plagosi tjetrin. Sa kanë dëgjuar krismat, ata që ishin në ajrim vijnë ta kapin pse na kape shokun, e kanë kapur shumë keq,” shpjegoi Karamuço.

Në vijim, eksperti pohoi se Mjaçaj u mbyll brenda dhomës së vizitave. Pas vrasjes, ai ikën me vrap, ndërsa gardianët filluan ta ndiqnin. Mjaçaj mbylli derën nga brenda dhe qëndroi në dhomën e takimeve, e cila ishte e hapur, pasi mund të aksesohet nga roja. Në këtë kontekst, Karamuço shtoi se Mjaçaj kërcënoi të gjithë burgun me një revolver që nuk kishte asnjë fishekë brenda.

“Arma është e kalibrit 22, revolver me 6 fishekë, por ekspertiza nxjerr që ka pasur vetëm 5. Por kërcënimi i tij ishte blof, sepse ai nuk kishte më plumba,” tha Karamuço.