Pas protestave të mbrëmshme në Serbi, studentët u mblodhën sot për të kërkuar qasje në listën zgjedhore, pas dyshimeve për rregullsinë e zgjedhjeve të 17 dhjetorit. Ata kërkojnë të kontrollojnë listën e votuesve dhe shprehen kundër vjedhjes së zgjedhjeve. Më shumë se 40 persona janë arrestuar gjatë protestës së mëparshme dhe tensionet kanë shtuar shqetësimet për sigurinë dhe stabilitetin në vend. Opozita dhe koalicioni “Serbia kundër dhunës” akuzojnë qeverinë për shfrytëzim të dhunës për të diskredituar protestat paqësore. Presidenti Vuçiç ka thirrur një mbledhje urgjente të Këshillit të Sigurisë Kombëtare. Kremlini ka reaguar, akuzuar Perëndimin për ndikim në situatën e tensionuar në Serbi. Këto ngjarje ndodhin pas akuzave për vjedhje zgjedhore dhe shqetësimeve të shumta lidhur me legjitimitetin e zgjedhjeve.
Presidenti Vuçiç deklaroi se është tentuar të merren me dhunë institucionet e Serbisë, shkruajnë mediat serbe.
“Deri tani janë arrestuar mbi 35 banditë. Aksioni vazhdon dhe nuk do të ndalet. Identiteti i disa personave është duke u përcaktuar në këto momente dhe të gjithë do të arrestohen gjatë natës”, tha Vuçiç citon Tajug.
Nga ana tjetër Koalicioni “Serbia kundër dhunës” (SPN) pretendon se incidentet në protestë u shkaktuan nga “huliganët e dërguar nga qeveria”.
“Autoritetet përdorën dhunë për t’i paraqitur protestat paqësore si të dhunshme”, thuhet në deklaratën e SPN-së.
Ky koalicion shtoi se “dërgimi i huliganëve” për të shkaktuar incidente në protestë është përdorur nga qeveria për ta dëmtuar iniciativën e protestuesve që kërkojnë përsëritjen e zgjedhjeve të 17 dhjetorit.
“Regjimi i presidentit të Serbisë, Aleksandar Vuçiç, ka treguar edhe një herë fytyrën e tij të vërtetë, të dhunshme”, tha koalicioni “Serbia kundër dhunës” më 25 dhjetor, citon REL.
Nuk vonoi dhe reagimi i Kremlinit, për të cilin është Perëndimi ai që po i vë “flakën situatës në Serbi”.
Kjo ishte protesta e shtatë e opozitës në kryeqytetin e Serbisë me kërkesën për anulimin e zgjedhjeve të mbajtura më 17 dhjetor. Lista “Serbia kundër dhunës” pretendon se Partia Progresive Serbe (SNS) në pushtet vodhi zgjedhjet, ndër të tjera, duke regjistruar në mënyrë fiktive votuesit e tyre nga vende jashtë Serbisë.
