Në një vendim të marë sot, Gjykata e Lartë ka kthyer çështjen e vulës dhe logos së Partisë Demokratike në Gjykatën e Apelit. Kolegji Civil i Gjykatës së Lartë argumenton se vendimi i Gjykatës së Apelit ka lejuar shkelje procedurale, duke e bërë të cenueshëm vendimin e dhënë.
Sipas vendimit, konflikti mbi se kujt i takon vula dhe logo e Partisë Demokratike është një çështje që duhet të zgjidhet nga Gjykata e Lartë. Kolegji Civil ka vlerësuar se Gjykata e Apelit nuk i ka përgjigjur kërkesave të palëve dhe ka shqyrtuar çështje që nuk janë ngritur si pretendime në ankimet respektive.
Për këto arsye, Gjykata e Lartë ka vendosur prishjen e vendimit të Gjykatës së Apelit dhe kthimin e çështjes për rishqyrtim në të njëjtën gjykatë, por me një trupë gjykuese të ndryshme. Vendimi është mbështetur në dispozitat e Kodit të Procedurës Civile dhe synon sigurimin e një procesi të drejtë dhe të rregullt gjyqësor.
Vendimi:
Kolegji Civil i Gjykatës së Lartë njofton, se në datën 27.12.2023, mori në shqyrtim në dhomë këshillimi çështjen me nr. 90600-00296-00-2023 akti, me palë kërkues: Partia Demokratike e Shqipërisë, përfaqësuar nga Komisioni i Përkohshëm i Rithemelimit, me objekt: “Depozitim ndryshimesh statutore dhe vendimmarrje të Kuvendit Kombëtar.”
Në përfundim të shqyrtimit gjyqësor, Kolegji Civil arriti në përfundimin se Gjykata e Apelit të Juridiksionit të Përgjithshëm Tiranë, me vendimin nr. 44, datë 03.03.2023 ka lejuar shkelje procedurale që e bëjnë të cenueshëm vendimin e dhënë prej saj.
Kolegji konstaton se, Gjykata e Apelit të Juridiksionit të Përgjithshëm Tiranë nuk i ka dhënë përgjigje kërkesave të palëve në ankimet respektive,ndërkohë që kryesisht ka marrë në shqyrtim çështje për të cilat palët nuk i kanë ngritur si pretendime në ankim, dhe që gjithsesi nuk përbëjnë shkak për prishjen e vendimit dhe dërgimin e çështjes për rishqyrtim.
Kolegji vlerëson se pretendimet e ngritura në ankimet e paraqitura pranë Gjykatës së Apelit të Juridiksionit të Përgjithshëm Tiranë janë çështje të cilat mund të zgjidheshin vetë nga ajo gjykatë.
Në këto kushte, Kolegji Civil i Gjykatës së Lartë, mbështetur në nenin 480 dhe nenin 485, pika 1, shkronja “c” të Kodit të Procedurës Civile, vendosi:
“Prishjen e vendimit nr. 44, datë 03.03.2023 të Gjykatës së Apelit të Juridiksionit të Përgjithshëm Tiranë dhe kthimin e çështjes për rishqyrtim në po atë gjykate, me një trupë tjetër gjykuese”.
