Një bashkëpunëtor i ‘Radio Marti’, Oscar Elias Biscet, u arrestua në Havanë nga autoritetet kubaneze, sipas deklaratës së Agjencisë së Shteteve të Bashkuara për Median Globale (USAGM). Biscet u kap nga policia ndërsa po dilte nga shtëpia e tij dhe po mbahet pa shpjegime. ‘Radio Marti’ financohet nga Kongresi amerikan dhe gëzon pavarësi editoriale.
Sylvia Rosabal, drejtore e Zyrës së Transmetimeve për Kubën, e dënoi arrestimin dhe bëri thirrje për lirimin e tij, duke e cilësuar ngjarjen si “një përpjekje e dukshme për të heshtur mbulimin e të drejtave të njeriut në Kubë”. Biscet njihet për angazhimin e tij në mbrojtje të të drejtave të njeriut dhe ka qenë i burgosur disa herë më parë.
I nderuar me Medaljen e Lirisë nga Presidenti Bush në vitin 2007, zoti Biscet njihet për mbulimin e të drejtave të njeriut në mbarë botën dhe në Kubë. Ai është burgosur disa herë në të kaluarën.
Pas dënimit me 25 vjet burgim, nën akuzat se kishte punuar me Shtetet e Bashkuara për të përmbysur qeverinë e Kubës, ai kaloi gati një dekadë në qeli përpara se të lirohej në vitin 2011 si rezultat i trysnisë ndërkombëtare.
Arrestimi i tij i fundit përkon me takimin vjetor të Projektit Emilia, një fushatë e themeluar nga zoti Biscet për të nxitur demokracinë dhe të drejtat e njeriut në Kubë. Ai u arrestua një vit më parë, pak para takimit të Projektit Emilia.
Pavarësisht nga rreziqet e njëpasnjëshme për sigurinë e tij, zoti Biscet ka refuzuar të largohet nga Kuba. Kuba renditet në vendin e 172 për sa i përket lirisë së shtypit, sipas Organizatës Gazetarët pa Kufij.
