Drejtori i Përgjithshëm i Autoritetit Kombëtar për Certifikimin Elektronik dhe Sigurinë Kibernetike të Shqipërisë (AKCESK), Igli Tafa, ka raportuar për sulmin kibernetik ndaj INSTAT. Tafa bëri të ditur se qëllimi i sulmit ishte fshirja e sistemit të INSTAT, por përmendi se deri më tani censusi është i sigurt dhe i paprekur.
“Ditën e djeshme në mëngjes u informuam për një sulm kibernetik drejt INSTAT dhe kemi ngritur menjëherë grupin e punës për të parë situatën. Nga analiza e deri tanishme është parë prezencë e indikatorëve apo treguesve që kanë pasur si qëllim fshirjen e sistemeve të INSTAT dhe kjo fshirje konsistonte në punën dhe aktivitetin e brendshëm të INSTAT. Por deri tani s’ka dalë asnjë gjurmë që të kompromentojë censin. Këto të dhëna janë të izoluara në një vend tjetër dhe nga analiza është parë që nuk janë gjetur gjurmë që shkojnë tek censusi. Deri tani censusi quhet i sigurt dhe i paprekur,” tha Tafa.
Ai gjithashtu shtoi se kjo situatë kërkon bashkëpunim të vazhdueshëm nga aktorët brendshëm dhe ndërkombëtarë dhe tha se ligji aktual nuk jep fuqi të mjaftueshme për të kryer proceset parandaluese dhe reaguese ndaj sulmeve kibernetike. Në fund, Drejtori i AKCESK tha se pritet një ndryshim ligji në fund të shkurtit për të përfshirë institucionet në proceset e sigurisë kibernetike.
