Ministri i Jashtëm i Serbisë, Ivica Daçiç, ka shprehur shqetësimin e tij mbi rritjen e trysnisë nga Brukseli ndaj Serbisë pas kërkesës së fundit për përfshirjen e Marrëveshjes së Ohrit në bisedimet për anëtarësim në Bashkimin Evropian (BE). Daçiç akuzon se Bashkimi Evropian po tenton të imponojë detyrime, duke theksuar se Serbia nuk e ka nënshkruar Marrëveshjen e Ohrit.
Sipas tij, kërkesa për Kapitullin 35 dhe plotësimin e Marrëveshjes së Ohrit shërben si një përpjekje për të detyruar zbatimin e plotë të kësaj marrëveshjeje, me të cilën Serbia nuk u pajtua. Ministri i Jashtëm shprehet se presidenti i Serbisë ka ndryshuar formulimet për të shmangur pohimet se Marrëveshja e Ohrit është një lloj njohje e pavarësisë së Kosovës.
Në këtë kontekst, Komisioni Evropian ka propozuar ndryshimet në kornizën e bisedimeve me Serbinë për anëtarësim në BE, duke e përfshirë Marrëveshjen e Ohrit dhe detyrimet e saj si pjesë të procesit të negociatave. Në vitin 2023, Serbia dhe Kosova arritën Marrëveshjen për normalizimin e marrëdhënieve, dhe tani këto dokumente duhet të bëhen pjesë integrale e procesit të anëtarësimit të Serbisë në BE.
“Tani po përpiqeni t’ia impononi Serbisë një detyrim përmes Bashkimit Evropian dhe Kapitullit 35, që nëse dëshiron të bëhet anëtare, duhet të ketë të ashtuquajturin zbatim të plotë të Marrëveshjes së Ohrit dhe pjesën e marrëveshjes me të cilën nuk u pajtua”, tha Daçiç.
Ai tha se Serbia nuk e ka nënshkruar Marrëveshjen e Ohrit.“Me deklaratën e presidentit të Serbisë, ai u shkëput nga disa formulime që sugjerojnë se kjo është një lloj njohjeje e Kosovës dhe se jemi dakord që Kosova të bëhet anëtare e Kombeve të Bashkuara dhe organizatave të tjera ndërkombëtare”, tha Daçiç.
