Një 35-vjeçar, i identifikuar si Besnik Kreci, është arrestuar në Skrapar pasi i maskuar dhe i armatosur ka kërcënuar një 28-vjeçare për të vjedhur celularin dhe ka kanosur me jetë një 53-vjeçar që ka ndërhyrë për të ndaluar tentativën e vjedhjes. Kreci është kapur nga forcat e policisë në afërsi të përroit të fshatit Çepan, ku kishte shkuar për t’u fshehur.

Gjatë arrestimit, policia ka gjetur në cilësinë e provës materiale një armë zjarri pistoletë, dy mjete prerëse (thika), dy maska (kapuça), një palë doreza dhe një elektrik dore në çantën e dorës së të arrestuarit. Besnik Kreci ka tentuar të vjedhë celularin e një 28-vjeçareje duke e kërcënuar me armë zjarri pistoletë.

Ndërkaq, ai ka kanosur me jetë një këmbësor 53-vjeçar që ka intervenuar për të ndaluar tentativën e vjedhjes. 35-vjeçari rezulton i dënuar më parë për veprat penale “Vjedhja me armë”, “Largimi i të burgosurit nga vendi i qëndrimit”, dhe “Marrëdhënie seksuale ose homoseksuale me persona të pazotë për t’u mbrojtur”.