Një 35-vjeçar nga Shkodra u arrestua në Vlorë, duke lëvizur me armë zjarri me silenciator dhe fishek në fole, gati për qitje më 8 gusht 2023. Gjashtë muaj më pas, mësohet se objektivi i atentatit që u parandalua me arrestimin e Amarildo Nikolli ishte Inez Hajrulla. Kjo ishte hera e tretë që Hajrulla, i njohur si i forti i Vlorës, shpëtonte nga një atentat. Prokuroria e Posaçme vijoi hetimet dhe identifikoi një tjetër të dyshuar në operacionin e koduar “Trekëndëshi”, duke arrestuar Muharem Koroveshin, i njohur edhe si Ismaili dhe Myftaraj. Dy bashkëpunëtorët e tij u shpallën në kërkim për dyshimet se kanë siguruar kushtet dhe mjetet për të kryer vrasjen, duke u akuzuar për vepra penale të grupit të strukturuar kriminal.

Edhe pse zyrtarisht nuk është bërë e ditur kush ishte objektivi, burimet sugjerojnë se tentativa për vrasje ndodhi verën e kaluar, ku Amarildo Nikolli u arrestua me pistoletë me silenciator, duke shkaktuar transferimin e dosjes tek SPAK për kompetencë pas zbulimit të elementëve të grupit të strukturuar kriminal. Nikolli dyshohet të jetë pajtuar si vrasës me pagesë me precedentë në Itali, ndërsa në Shqipëri nuk ishte i skeduar. Arrestimi i tij u bë në një pastiçeri pranë kompleksit “Oslo” në Vlorë, zonë ku vepron grupi i Edison Harizajt, dhe dyshimet ishin se Inez Hajrulla ishte në qendër të synimit të atentatit.