Udhëheqësi më i rëndësishëm i opozitës ruse për dekadën e fundit, Alexei Navalny, ka vdekur në burg në Siberi, sipas një deklarate të lëshuar nga një departament lokal i Shërbimit Federal të Burgjeve. Navalny, i cili ishte kundërshtari kryesor i presidentit Vladimir Putin, po vuante një dënim me 19 vjet burg për vepra penale të cilat shiheshin gjerësisht si të motivuara politikisht. Ai u arrestua në vitin 2021.

Sipas informacionit të dhënë nga Shërbimi Federal i Burgjeve, Navalny u ndje keq pas një shëtitjeje, dhe mediat e kontrolluara nga Rusia kanë cituar këtë deklaratë, duke raportuar se Navalny, 47 vjeç, ka vdekur.

“Më 16 shkurt të këtij viti, vdiq i burgosuri Navalny. Ai u ndje keq pas një shëtitjeje, pothuajse menjëherë humbi vetëdijen. Menjëherë kanë mbërritur punonjësit mjekësorë nga institucioni dhe ekipi mjekësor i urgjencës. “U kryen të gjitha masat e nevojshme reanimuese, por nuk dhanë rezultate pozitive. Mjekët e urgjencës konfirmuan vdekjen e të dënuarit. Shkaqet e vdekjes janë duke u konstatuar,” thuhet në deklaratë.