Kuvendi i Shqipërisë pritet të miratojë sot marrëveshjen me Italinë për emigracionin, amnistinë penale, si dhe ndryshimet ligjore te ligji për zonat e mbrojtura.

Në faqen e Kuvendit është zyrtarizuar rendi i ditës i seancës plenare të kësaj të enjteje. Sipas shkresës së firmosur nga Kryetarja Lindita Nikolla keto do te jene pikat e diskutimeve.

1.Diskutimi dhe votimi për Projektligjin “Për ratifikimin e marrëveshjes në lidhje me programin e shkëmbimit të studimeve universitare në Evropën Qendrore CEEPUS IV”.

2.Diskutimi dhe votimi për Projektligjin “Për ratifikimin e protokollit ndërmjet Këshillit të Ministrave të Republikës së Shqipërisë dhe qeverisë së Republikës Italiane për forcimin e bashkëpunimit në fushën e migracionit”. Kjo marrëveshje ka kaluar filtret e Gjykatës Kushtetuese pas kundërshtive të opozitës.

3.Diskutimi dhe votimi për Amnistinë Penale, e cila kërkon mbështetjen e 84 votave. Nga ky projektligj përfitojnë mbi 700 të dënuar.

4.Diskutimi dhe votimi për miratimin e ndryshimeve ligjore në ligjin për zonat e mbrojtura. Këto ndryshime ligjore parashikojnë një rol më të fortë të Bashkive për zonat e mbrojtura, ndërsa për opozitën ato mund të hapin rrugën për betonizimin e tyre.