Specialja për Krime të Rënda dhe Korrupsion (SPAK) ka mbyllur hetimet dhe ka dërguar në Gjykatën e Posaçme aktakuzën për 7 trafikantë të klandestinëve që u përfshën në ngjarjen e 25 majit 2023, kur hapën zjarr ndaj policisë kufitare në Morinë. SPAK ka kërkuar gjykim për këta persona, pjesë e dy grupeve kriminale që vepronin në Shqipëri dhe Kosovë, duke kryer vepra të rënda penale.
Grupi i akuzuar përbëhet nga 5 siri-anë dhe 2 algjerianë, të cilët akuzohen për vrasje të punonjësve të policisë, vrasje me dashje (e mbetur në tentativë), dhënie ndihmë për kalim të paligjshëm për qëllime përfitimesh, trafikim të armëve, dhe pjesëmarrje në grup kriminal të strukturuar. SPAK vlerëson se këta individë kanë organizuar veprimtari të ndryshme në formën e bashkëpunimit të veçantë, duke operuar në mënyrë të strukturuar me shkallë të lartë organizimi dhe rrezikshmëri shoqërore.
Grupi i parë përbëhet nga Muhamed Shehab, Muhammed Nasir, dhe Nagid Alabdalah, ndërsa grupi i dytë nga Sultan Grimash, Muhammed Radaën, Ayoub Bahhoo, dhe Rabi Lqadi. SPAK ka evidentuar se këta individë kanë jetuar në Shqipëri që nga viti 2019 dhe kanë operuar në bashkëpunim me grupe të tjera kriminale në shumë shtete, duke përfshirë Greqinë, Turqinë, Kosovën, Serbinë, dhe Gjermaninë. Hetimet kanë treguar se ata janë pjesë e një rrjeti të gjerë trafiku të qenieve njerëzore, duke kërcënuar sigurinë dhe jetën e emigrantëve dhe personelit policor. Grupi ka përdorur edhe armë për të mbrojtur veprimtarinë e tyre të paligjshme. Të gjithë akuzuarit aktualisht janë në masë “arrest në burg”.
