Një 20-vjeçar është arrestuar nga Policia në Dibër pasi ka ushtruar dhunë fizike ndaj bashkëjetueses së tij. Ngjarja ka ndodhur në fshatin Zall Reç pas një sherri për konflikte të dobëta.

Policia ka ndërhyrë menjëherë pas marrjes së njoftimit për një konflikt në familje dhe ka parandaluar përshkallëzimin e situatës. Shtetasi A.Sh., 20 vjeç, është arrestuar në flagrancë, dhe materialet procedurale janë dërguar te Prokuroria pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme. Autoritetet vazhdojnë hetimet për të zbuluar rrethanat e ngjarjes dhe motivet e konfliktit në familje.

“Shërbimet e Komisariatit të Policisë Dibër, pas marrjes së njoftimit se në fshatin Zall Reç, po ndodhte një konflikt në familje, kanë reaguar menjëherë duke parandaluar përshkallëzimin e mëtejshëm të konfliktit. Si rezultat, shërbimet e Policisë kapën dhe arrestuan në flagrancë shtetasin A.Sh., 20 vjeç, banues në fshatin Zall Reç, Dibër. Ky shtetas, për motive të dobëta ishte konfliktuar dhe kishte dhunuar fizikisht bashkëjetuesen e tij”, njofton policia.