Ministria e Mbrojtjes ka publikuar për herë të parë pamjet e brendshme të bazës së NATO-s në Kuçovë, duke shënuar përfundimin e përgatitjeve për fillimin e operacioneve. Komandanti i Forcës Ajrore, Gjeneral brigade Ferdinand Dimo, shprehet se baza do të shërbejë si qendër kryesore për stërvitjet dhe operacionet e Forcës Ajrore, duke u bërë gjithashtu një pikë qendrore për trupat dhe mjetet fluturuese të Aleancës.
Ministri i Mbrojtjes, Niko Peleshi, thekson se hapja e kësaj bazeje do të luajë një rol kyç në mbështetjen e operacioneve dhe stërvitjeve të NATO-s, ndërsa gjenerali Dimo shton se impakti zhvillimor i kësaj bazeje në komunitetin dhe qarkun e Beratit është i jashtëzakonshëm.
Në ceremoninë e inaugurimit, e cila është parashikuar për më 4 mars, pritet të marrin pjesë përfaqësues të lartë të shtetit shqiptar, NATO-s dhe SHBA-ve, shënojnë autoritetet.
“Edhe pak ditë nga përurimi i Bazës Ajrore Taktike të NATO-s në Kuçovë, e cila do të luajë një rol kyç në mbështetjen e operacioneve dhe stërvitjeve të NATO-s. Kjo bazë do të shërbejë si qendër për aktivitetet e Forcës sonë Ajrore, duke ofruar infrastrukturë të avancuar për avionët luftarakë dhe ata të transportit të Aleancës. Ky hap shënon një fazë të re në forcimin e kapaciteteve tona për bashkëpunim ndërkombëtar dhe siguri rajonale”, shkruan Peleshi në Facebook.“Ndërtimi i bazës ajrore të NATO-s në Kuçovë ka një impakt të jashtëzakonshëm zhvillimor në komunitet dhe në të gjithë hapësirën e qarkut të Beratit”, shprehet Gjeneral brigade Ferdinand Dimo.“Në vitin 2021 u parashikuan të kryheshin investimet për rivitalizimin e instalimeve të bazës së Kuçovës. Tashmë sot jemi në përfundim të implementimit të 3 projekteve të rëndësishme siç është sistemi i rrethimit dhe i sigurisë, po ashtu edhe i mbrojtjes perimetrale të bazës. Nga NATO janë të investuara afërsisht 50 milionë euro dhe më shumë se 5 milionë euro janë të investuara nga qeveria shqiptare”, sqaron Komandanti i Forcës Ajrore.
