Një 22-vjeçar është arrestuar nga policia e Tiranës për shantazh dhe denigrim nëpërmjet publikimit të video dhe fotove të qytetarëve në profile false në rrjetet sociale. Ai kërkonte shuma parash për të fshirë postimet e tij të ofenduese. Nga verifikimet ka rezultuar se ky individ është autor i disa ngjarjeve të kësaj natyre kriminale, duke prekur edhe persona që jetojnë jashtë Shqipërisë. Ky ndalim vjen si pasojë e një operacioni të koduar “R-13” nga Seksioni i Hetimit të Krimeve Kibernetike.

Krimi Kibernerik i Policisë së Tiranës ka zbuluar se 22-vjeçari Endri Xhaferri, në këmbim të fshirjes së profileve në rrjetet sociale që përmbanin foto dhe video të cilat u përkisnin personave të ndryshëm, kërkonte shuma parash, që shkonin deri në 1000 €.

“Shërbimet e Sektorit për Hetimin e Krimeve Kibernetike në bashkëpunim me Komisariatin e Policisë Nr. 6, në vijim të punës për goditjen e krimeve kibernetike dhe vënien përpara përgjegjësisë penale të shtetasve që i kryejnë ato, kanë organizuar dhe finalizuar operacionin policor të koduar “R-13”.Si rezultat i këtij operacioni u ndalua shtetasi E. Xh., 22 vjeç, banues në Tiranë.

Nga veprimet hetimore të kryera ka rezultuar se ky shtetas merrte fotografi dhe video të personave të ndryshëm në rrjete sociale, të cilat i publikonte në profile false, me shprehje fyese dhe denigruese. Për fshirjen e këtyre postimeve, 22-vjeçari, kërkonte në këmbim shuma parash, që shkonin deri në 1000 €”,-njofton policia.