Një nga kriminelët shqiptarë me rrezikshmëri të lartë, Leonard Mnella, është arrestuar në Miçigan të Shteteve të Bashkuara të Amerikës dhe ekstraduar në Shqipëri. Mnella është i dënuar nga autoritetet italiane me 25-vjet burg për vepra të rënda penale, duke përfshirë bashkëpunim në organizatë kriminale, rrëmbim personi, tentativë zhvatjeje, shkelje të ligjit për armët dhe trafik droge në sasi të mëdha.

Krimineli shqiptar kishte shpallur vdekjen e tij në vitin 2013 nëpërmjet një vendimi gjyqësor të një Gjykate shqiptare, ndërsa ishte në arrati. Ai pretendonte se ishte i vdekur që nga viti 2003 në Amerikën Latine, duke shpëtuar kështu nga ndjekja e autoriteteve.

Operacioni për arrestimin dhe ekstradimin e Leonard Mnella u realizua në bashkëpunim të ngushtë mes Departamentit të Policisë Kriminale, Agjencisë DSS/OCIU (Shërbimi Diplomatik i Sigurisë/Njësia e Hetimeve Kriminale) pranë Ambasadës së Shteteve të Bashkuara në Tiranë dhe DHS/ICE-ERO (Departamenti Sigurisë Kombëtare/Agjencia ligjzbatuese e Emigracionit dhe Doganave) të SHBA. Mnella tashmë do të ballafaqohet me akuzat për veprat e tij kriminale në gjykatat shqiptare.