Një 38-vjeçar është arrestuar ditën e sotme në Vaun e Dejës pasi ka tentuar të vrasë dy kolegë të punës duke i përplasur me makinë. Mersin Mlloja, infermieri, është akuzuar për tentativë vrasje pas incidentit ku përplasi me makinë kolegët e tij, Davë dhe Kristian Ndoja, nënë e bir, në korsinë e dedikuar për këmbësorë. Mlloja pretendon se ata e bullizonin në punë. Policia ka arrestuar Mllojën në flagrancë dhe ka sekuestruar makinën e tij si provë materiale. Banorët e përplasur nuk janë në rrezik për jetën.

Njoftimi i policisë:

“Shërbimet e Komisariatit të Policisë Vau i Dejës, menjëherë pas marrjes së njoftimit se një shtetas kishte përplasur me automjetin që drejtonte, 2 shtetas që po kalonin në korsinë e dedikuar për këmbësorë, kanë nisur menjëherë veprimet hetimore për zbardhjen e rrethanave të rastit, identifikimin dhe kapjen e drejtuesit të automjetit.

Në përfundim të veprimeve të kryera në bashkëpunim me Seksionin për Hetimin e Krimeve ndaj Personit të DVP Shkodër, u arrestua në flagrancë shtetasi Mersin Mlloja, 38 vjeç, banues në fshatin Kosmaç, për veprën penale “Vrasja me dashje”, mbetur në tentativë.

Ky shtetas, më datë 15.03.2024, në Bushat, dyshohet se për motive të dobëta, ka tentuar të vrasë, duke i përplasur me automjetin që drejtonte, në korsinë e dedikuar për këmbësorë, 2 kolegët e tij, shtetasit D. N., 60 vjeçe dhe K. N., 32 vjeç (nënë e bir), të cilët janë jashtë rrezikut për jetën.

Automjeti që drejtonte shtetasi M. M. është sekuestruar në cilësinë e provës materiale”.