Lulzim Basha ka refuzuar ofertën e Gazment Bardhit dhe grupit të Rithemelimit për të bashkërenduar në dialog, duke theksuar se Partia Demokratike nuk ka bërë betejë për karrige, por për drejtësi zgjedhore.

Ai argumentoi se përfaqësuesit e PD-së në komisionin për reformën zgjedhore kërkojnë lista të hapura, votim elektronik, votë të diasporës dhe zonë zgjedhore për Shqipërinë, duke theksuar se kjo është e rëndësishme për të siguruar drejtësi për shqiptarët.

Basha vlerësoi marrëveshjen e mundshme mes Partisë Socialiste dhe Rithemelimit si një pazar, dhe tha se PD nuk do të pranojë kompromise që i bëjnë qytetarët e tyre të vuajnë.

“S’duam karrigen, ne duam të drejtat e shqiptarëve, ne duam që pazari 34 vjeçar i fëlliqtë, trashëgimnia më e pisët e Ramiz Alisë, trashgimtarit të fundit komunist të marrë fund. Sepse është ky Pazar që rëndon pronarët dhe të përndjekurit, sipërmarrësit dhe profesionistët, fermerët dhe arsimtarët, rininë shqiptare. S’na duhen karriget. Thojini shqiptarëve sot, ku qëndroni në raport me listat e hapura? Jeni për lista të hapura, po apo jo, votoni për listat e hapura, votimin elektronik, Shqipëria një zonë, votën e diasporës, s’na duhen karriget. Këtë betejë nuk e nisëm për karrige, por janë kaq të obsesuar me karrigen, e kanë ngjitur kaq shumë kokën, barkun pas karrigeve sa u është bërë mendja karrige. Dhe mendojnë se pasi bënë pazarin me Edi Ramën, mund të kthehen tek ne e të na thonë: keni dhe ju një karrige. Ju plaçin sytë, se kuptoni që kemi 2 vite e gjysmë që e bëjmë për shqiptarët jo për karrige? Dhe të bësh betejë për shqiptarët nuk është e lehtë në një vend që ka 34 vite kastë politike që bëjnë betejë për veten e vet me metodat dhe mënyrat më të pista”, tha Basha

Ai theksoi se beteja e PD-së është për të drejtat e shqiptarëve dhe për të larguar praktikat korruptive dhe klienteliste nga politika shqiptare.