Presidentja e Kosovës, Vjosa Osmani, ka deklaruar se djegia e fëmijëve të Kosovës për së gjalli është e vërteta e Serbisë. Këto fjalë ajo i ka përdorur në përkujtim të 25-vjetorit të Masakrës në shtëpinë e familjes Vejsa në Gjakovë.

Osmani ka theksuar se emrat e fëmijëve dhe grave martire të familjeve Vejsa, Caka, Haxhiavdija, Nuqi, Hoxha dhe Gashi janë kujtim i përhershëm dhe dëshmojnë rrugën e vështirë të aspiratave të Kosovës për liri e shtet. Në një njoftim të Zyrës së Presidentes, theksohet se “25-vjet më parë, regjimi gjenocidal serb, egërsinë e manifestoi kur vrau e pastaj dogji në bodrumin e shtëpisë së familjes Vejsa anëtarët e këtyre familjeve nga mosha 2 e deri në atë 75 vjeçe”.

E para e shtetit shtoi se do të vazhdojë betejën për drejtësi.