Deputetja e PS-së Klodiana Spahiu kërkon përmbajtje të rendit të ditës dhe respekt për fjalën e të gjithëve. Kryetarja e Komisionit, Albana Vokshi, ironizon duke thënë “Sa shumë paske vuajtur mi Klod”, duke iu përgjigjur me një ton humoristik.

Megjithatë, debati shkon edhe më tej kur deputeti i PS-së, Plarent Ndreca, kërkon fjalën me ngulm dhe dalin në pah tensionet në tryezë. Ndërsa Vokshi përpiqet të qetësojë situatën, Ndreca e akuzon për paragjykim dhe tentativë për të imponuar pikëpamjet e saj. Çështja merr më shumë tension kur Vokshi ndalon Ndreca nga fjalimi, duke e akuzuar për ndërhyrje në fjalën e saj dhe duke theksuar nevojën për respektim të rregullave të komisionit.

Vokshi: Zoti Ndreca mund të dëgjojmë zonjën Zhupa, pastaj ta jap

Ndreca: A ka mundësi të marr fjalën, e nisa dua ta mbaroj.

Vokshi: Jo, më keni ndërhyrë kur unë isha duke folur. Po më kërcënon, për çfarë më paralajmëron. Në mënyrë të dhunshme, asnjë nuk e merr fjalën. Do ndjekim rregullin, ka anëtarë të tjerë që kanë kërkuar para jush. I kanë dhënë një detyrë dhe do ta çoj deri në fund, detyrën për të bërë zhurmuesin.

Ndreca: Është i hapur mikrofoni, a mund të flas?

Vokshi: Jeni shumë i ri si deputet duhet të mësoni ca gjëra

Ndreca: Jam mjaftueshëm me eksperiencë

Vokshi: Po, po, eksperiencë në administratë. Nuk do bënit ato gafa nëse do të kishit eksperiencë.

Ndreca: Mënyra sesi silleni po e shfaqni vetëm sikur jeni eprorja e të gjithëve këtu. Jeni e para në mes të këtyre të barabartëve. Nëse vini këtu me teka e qejfe edhe me ato që ju bëni në mbledhje te partia, ky komision nuk ka për të ecur me ato që ju doni të impononi.