Në një intervistë televizive, terapistja Eriselda Dyrmishi ka shpjeguar se autizmi nuk shoqërohet me shenja fizike dalluese të dukshme te fëmijët. Dyrmishi, e specializuar në trajtimin e fëmijëve me autizëm, theksoi se autizmi nuk është një sëmundje, por një çrregullim kompleks neurobiologjik i trurit.

“Autizmi nuk është një sëmundje por është një çrregullim kompleks neurobiologjik i trurit i cili karakterizohet nga disa simptoma të tipit mungesa e gjuhës ekspresive ose zhvillimi i gjuhës ekspresive në nivelet e duhura për moshën e individit,” shpjegoi Dyrmishi.

Ajo vuri në dukje se një nga shenjat e autizmit është mungesa e zhvillimit të gjuhës në moshën fillestare, që fillon që në moshën 1 vjec deri në 1 vjec e gjysmë. Fëmijët me autizëm gjithashtu mund të kenë vështirësi në reagimin ndaj komandave dhe në përgjigjen e thirrjeve në emër.

“Interesat e kufizuara dhe mungesa e socializimit janë karakteristika të tjera të fëmijëve me autizëm,” shtoi ajo.

Dyrmishi përfundoi duke theksuar se, në shumicën e rasteve, autizmi nuk shoqërohet me shenja fizike të dukshme dhe është e rëndësishme të njihen shenjat e këtij çrregullimi në moshën fillestare për të filluar trajtimin dhe ndihmën e duhur sa më herët të jetë e mundur.