Kryeministri Edi Rama këtë të diel, inspektoi punimet në “Lungumaren 2”, në Vlorë, e cila do të kthehet në një plazh publik, sipas të gjitha standardeve evropiane.

Teksa inspektonte punimet, në shoqërinë e dy përfaqësuesve të firmës, kryeministri interesohej për detajet.

I shoqëruar nga inxhinieri që mbikëqyr punimet, kryeministri nuk ka lënë pa thumbuar edhe kryetarin e Bashkisë së Vlorës, Dritan Leli, rruga e të cilit është ndarë tanimë nga Partia Socialiste për shkak se nuk pranoi dorëheqjen për t’u përfshirë në listat e kandidatëve për deputet.

Në një moment ai pyet për fushën e basketbollit dhe ambientet e tjera sportive. Përfaqësuesi i firmës, tha se njëra prej tyre ka përfunduar nga kryebashkiaku Dritan Leli, ndërsa të tjerat, do të jenë gati para sezonit turistik.

Sakaq, Rama nuk nguroi të sulmonte kryebashkiakun Leli, e nxiti përfaqësuesit të vazhdojnë punimet e të mos presin kryebashkiakun.