Sali Berisha dhe dhëndri i tij, Jamarbër Malltezi, po vazhdojnë përpjekjet e tyre për të ndryshuar masat e sigurisë të vendosura nga GJKKO me kërkesë të SPAK. Ata tani janë drejtuar për herë të dhjetë në Gjykatën e Posaçme për të kërkuar zëvendësimin e këtyre masave me një më të lehtë, si detyrimi për tu paraqitur.

Avokatët e tyre argumentojnë se në këtë fazë të hetimit, nevojat për mbajtjen e tyre në masën e arrestit shtëpie janë zbutur, dhe për këtë arsye kërkojnë një masë më të lehtë. Gjyqtarja Irena Gjoka ka caktuar një seancë për të shqyrtuar kërkesat e tyre, të cilat do të zhvillohen sot në orën 13:00.

Berisha është akuzuar për korrupsion pasiv në bashkëpunim, ndërsa Malltezi për të njëjtën veprë penale, lidhur me privatizimin e ish kompleksit Partizani. Gjykata ka refuzuar më parë kërkesat e tyre për ndryshim të masave të sigurisë, ndërsa prokuroria e Posaçme ka kundërshtuar në të gjitha rastet, duke kërkuar vazhdimin e masave të rrepta.