Lajmi trishtues për ndarjen nga jeta e poetes së njohur, Lindita Ahmeti, ka shkaktuar dhimbje të thella te familjarët dhe miqtë e saj, të cilët e kishin adhuruar atë shumë. Ajo u nda nga jeta në moshën 50-vjeçare, duke lënë një boshllëk të madh në botën letrare.

Xhabir Ahmeti, shkrimtari i njohur dhe babai i Linditës, bëri të ditur lajmin tragjik në një postim në Facebook. “Lajm i tmerrshëm. E humbëm edhe vajzën tonë të mrekullueshme Linditën para një gjysmë ore”, shkroi ai në orët e hershme të mëngjesit të 9 prillit.

Përveçse ishte vajza e një shkrimtari të njohur si Xhabir Ahmeti dhe motra e aktorit të ndjerë Luran Ahmeti, Lindita arriti të bëhej e njohur në botën e letërsisë për poezitë dhe shkrimet e saj të mrekullueshme. Lindita Ahmeti lindi në Prizren më 26 prill 1973 dhe pas shkollës së mesme në Shkup, studioi filologjinë klasike në Universitetin e Shkupit.

Ajo vazhdoi studimet në Universitetin e Tetovës dhe punoi në Institutin e Trashëgimisë Shpirtërore e Kulturore të Shqiptarëve.

Me një dedikim të palëkundur, ajo shkroi poezi në gjuhën shqipe dhe maqedonase që nga fillimi i viteve të ’90-ta dhe publikoi disa vëllime me poezi, duke lënë pas një trashëgimi të çmuar në botën e letërsisë shqiptare.